二零二五年四月四日(星期六)
因為童趣房有專為小朋友而設的床，逸逸當然不會錯過，不過因為床太小，我就無辦法陪瞓。
起初是輾轉難眠，又走過落嚟大人床找我，不過硬頸的她又不甘心放棄小朋友床，最後爬返上小朋友床成功自己瞓到天光。
今天早上也是去享用千色早餐，最好食係腸粉，即叫即做，又滑又有米香。
粥檔好有heart，我諗住生滾粥即係任何配料可以隨意配搭，於是叫左豬紅豬肝粥，佢本身餐牌有豬紅粥、豬肝瘦肉粥同埋豬什粥，職員竟然係喺鍋豬什粥揀豬紅同豬肝俾我。
仲有內地的菜真係特別甜，千祈唔好錯過。
食完午餐我地就先去預約按摩，之後再去浸溫泉。
今日無太陽涼咗好多，所以一早講到明唔去泳池玩，但可以去玩瀑布，起碼淋完凍冰冰的瀑布可以即刻係隔離溫泉浸返暖個身。
今早係六福湯入面浸咗個可以治咳嗽、盜汗和口乾的泉，好似好啱我地，之後仲飲咗杯超清甜的竹蔗茅根，不過後來想再去飲就無咗。另外今次浸咗個香薰泉，浸完真係成身香噴噴。恆仔繼續只係雙腳落水，我叫佢索性不如去瞓下熱石，舒服又唔怕濕水。
浸到差不多時間就要返房換衫執嘢CHECK OUT，因為約咗按摩。逸逸因為昨日坐唔到係LOBBY張櫈，今日要坐返。
按摩的地方又轉咗位，上次係休息廳上面，今次搬咗去新泳池隔離。
今次係逸逸第一次按摩
逸逸按摩的時候竟然由頭狂笑到尾，仲要一陣掩住臉，一陣又縮作一團，趴低按背脊時話望住個窿好搞笑但係透唔到氣，幫佢按摩既姨姨不停笑住同佢傾計，連幫我同恆仔按摩的按摩師望住逸逸都忍唔住笑。
因為我們打算回到港珠澳口岸先吃午餐，所以按完摩離開御溫泉之前先去休息廳食少少嘢，麵包超級好食，逸逸總共食咗四塊包，一塊奶醬、一塊果醬，另外兩塊淨食。
時間剛剛好，食飽飽就去搭2PM接駁車返港珠澳口岸了。
好彩剛才食得夠飽，可能因為清明節的關係，原本40分鐘的車程搭咗1個半小時，去到港珠澳口岸時已差不多4pm了。
我們再次嚟到口岸天地搵食，今次多咗好多餐廳。
可愛的小太空人
我們選了樓媽隆江豬腳飯
雖然吃的是簡餐，但係餐廳的裝修都好精緻。
招牌隆江豬腳飯都幾好味，燉湯都唔錯。
食完飯就搭金巴返香港了﹗