二零二四年七月二十八日(星期日)
自從考完評估三，逸逸就開始問我今年去邊度旅行。雖然暫時未有定案，但預計都係8月最後一個星期先出發，但係無論可唔可以離開香港都係7月拎咗四日大假陪逸逸放下暑假。
7月12日確認7月尾可以飛，但係本身今年逸逸的暑期活動排得密密麻麻，星期二下午學滾軸溜冰、星期四下午學跳舞、星期六下午學田徑、星期日早上學曲棍球，因為滾軸溜冰是私人班可以隨意調時間，最後星期日下午出發，星期四早上回程，五日四夜晚機去早機返，玩足三日，去東京食下逛下都唔錯。
早上出京士柏運動場學曲棍球，一落堂就飛車返屋企沖個涼就坐UBER去機場。
逸逸話記得上次來機場時見過依個瀑布仲玩咗好耐。
Check in櫃檯長長的人龍，但是我們沒有排隊。我們一來到就直接行去自助Check in機Check in，然後再去隔離櫃檯寄埋行李，完全唔駛排隊，10分鐘搞掂，又快捷又易用，好奇點解仲有咁多人堅持排隊？
兩點鬆啲就攪掂晒啲嘢可以食午餐，去親機場通常都係幫襯翠華費事煩，而且我真係好鍾意飲佢嗰杯咖啡。
西加航空似乎係機場有Function，好懷念當年謝西加的旅遊節目。
巨型的大貓，吸引到好多人興奮的跑埋去影相，包括逸逸。
出發喇~
飛機要DELAY35分鐘，去到東京更加夜了……
明明上年暑假坐香港航空去大阪都仲有空中娛樂系統，今次乜都無。
其實我哋都早有預備，Download定電影電視劇係電話同iPad，但係無諗過我電話經過一個上午已經無乜電，但香港航空又好嚴格執行飛行期間不可使用Power Bank，為了慳電，所以我同逸逸一齊畫公仔，而描繪對像就係機倉入面見到的任何東西⋯⋯
雖然無空中娛樂設施，但係有熱餐食。其實香港航空都係喺7月5日先宣布7月8日開始在指定航班恢復熱餐供應，個魯肉飯雖然細細份但係好好食，而且仲有雪糕做甜品，對我嚟講係Bonus。
逸逸同恆仔打保齡球
來到東京成田機場已經10PM，我們受到MARIO家族的熱烈歡迎。
見到招財貓，KIKI都即刻出嚟一齊招手合照。
今次我地住澀谷，不過依個時間肯俾多啲錢都已經無得搭N’EX，最後我們乘搭10:40PM開出的SKYLINER去日暮里再轉山手線去澀谷……
逸逸話依個廣告好搞笑
係山手線上面發生了一件驚嚇事件，就係我地差啲唔見咗KIKI，逸逸可能因為太累，竟然落車唔記得拎KIKI，好彩有個日本男人跑落車叫住我地，KIKI先可以繼續留係我地身邊。
去到涩谷已經半夜12點，我地係前往酒店的路上經過便利店買咗宵夜。
今次入住DORMY INN PREMIUM 澀谷神宮前店，一入到房超級驚嚇，因為張床超級細，根本睡不下三個人，最後我們三個幾晚都睡得不好，因為連轉身的空間都不夠。沒想過我們又再次遇上逸逸BB時候去東京住新宿的GRACERY HOTEL一模一樣的經驗。
其實訂房的時候我也有考慮床的呎吋，明明在照片上床看起來是蠻大的，起碼比兩個並排的枕頭還濶，沒想過原來這酒店的枕頭呎吋比一般的細，我就是被它的枕頭騙了……
宵夜時間，日本便利店的選擇永遠都超級豐富，我食咗明太子飯糰，又食咗一件恆仔的稻荷壽司。
逸逸梗係冷烏冬喇﹗係飛機講起買宵夜佢已經話要食冷麵或者冷烏冬喇~
我們旅程期間正值舉行巴黎奧運會，日本電視台播放的都是日本運動員擅長或者有份參予的項目，來到日本的第一個晚上我們就有幸欣賞到街頭滑板的比賽，更被一個名叫吉沢恋的選手所吸引住。
當晚其實我們沒有看完整個比賽就睡覺了，沒想到一覺醒來她已成為了金牌選手，而且還聽到她有如熱血漫畫般的滑板之路，真的很AMAZING。