二零二四年七月二十九日(星期一)
雖然DORMY INN的床因為呎吋太細而偏離了我的EXPECTATION，但除了床的呎吋以外，DORMY在其他部份的得分是非常高的，其一就是這兒的大浴池。
去日本旅行最想就係浸溫泉，就算唔係溫泉水但係浸浴都可以消除疲勞，所以揀依間酒店其中一個原因就係佢有大浴池。
逸逸都係溫泉控，昨晚很夜才到達酒店，瞓覺前已經同她講好會嘗試叫佢起身一齊浸浴，到時如果佢想繼續瞓就我自己落去。今早我叫她起床，當然就是要繼續睡，我就自己一個落嚟享用大浴池了。這兒毛巾和沐浴用品齊備，也有LOCKER，只要帶備大浴場密碼就可以兩手FING FING咁過來。
大浴場在早上供應益力多，晚上供應雪條，依個係我出發前已經同逸逸介紹咗，佢亦一早背熟咗，而且非常期待。
成個櫃放滿冰凍的益力多，自由享用。
浸完浴嘆一支冰凍益力多，爽呀~
仲可以一邊飲益力多一邊睇漫畫，如果識日文的話……
返上房就叫晒大家起身梳洗，瞓醒覺的逸逸對於我無堅持叫佢起身去浸溫泉好唔高興，話下次一定要叫到佢起身為止，我還價話最多叫三次，所以之後幾朝都一叫就醒。
介紹返依間酒店部LIFT，佢入面有一張櫈仔，櫈仔入面放了防災用品，困LIFT都唔駛驚。
酒店的早餐又係另一個精彩的部分。
餐廳唔算好大，但食物種類都好豐富，算係麻雀雖小五臟俱全。
最正係有得任食橙色蜜瓜，超級甜，有係市場買500円一件的水準。
來到日本一定要食日式早餐，依度個白飯超級好食~
再食蜜瓜加甜品，正﹗
今日見到大藍天，東京個太陽曬落個身度好似熱過香港好多咁。
我們行路過去澀谷站，沿路來一個澀谷散步。
路上遇上幾個工程人員，他們的裝備好強，雖然著晒長袖外套，但係入面有大風扇吹住架。
我其實對於澀谷的路也有印象，因為2015年8月跟阿高以及2017年5月跟恆仔逸逸都有過來逛街，最印象深刻是兩次都有逛這間很FANCY的DISNEY STORE，不過今天我們來得太早仲未開門，只能夠過門而不入。
終於來到澀谷著名的澀谷十字路口，點都要影返張相。逸逸對依度都好有印象架，當年唔係因為佢未夠一歲時嚟過喇~而係玩MARIO & SONIC AT THE OLYMPIC GAMES TOKYO 2020時其中一個任務係要喺澀谷十字路口搵奇諾比奧呀~
仲要同忠犬八公打個招呼，不過因為人太多我地無埋去排隊影相了。
我地今天的第一個目的地是乒乓球用品店T. T. Kokusai。
係預備行程的時候，我通常都會問大家有咩想做或者有咩想食，而最近從新燃起對乒乓球熱情的恆仔就要求想行下日本的乒乓球用品專賣店，於是我上網搵咗依間係澀谷站附近的T. T. Kokusai。
在我腦海入面，買乒乓球拍就是去文具舖，依家仲會諗起可以去迪卡儂，而牌子只認識紅雙喜。不過其實乒乓球拍可以好講究，所以買拍的時候又話揀木又話揀膠，仲有不同的形狀。
乒乓球拍主要由底板、膠皮和海綿三部分組成，上圖好似CD的東西就係乒乓球拍上面的膠皮。
依個就係在巴黎奧運討論度非常高的六邊形乒乓球拍，我其實唔係好明白點解作為一個比賽項目，球拍連形狀都可以改變？
底板都是純木的，會因木質的不同而有不同的重量和軟硬度，不同的款式適合不同球員的打法。
嘩﹗個圖案好靚~ SORRY，幾靚都無用，因為之後要加返膠皮係上面蓋住佢。
球拍都有名，而且個名好有型，藍色的叫蒼天，紅色的叫曉炎。
逸逸依家都認得BUTTERFLY依個牌子了。
個袋用嚟放乒乓波架，好CUTE~
小小乒乓球拍掛飾
揀到拍唔知啱唔啱自己打，依度仲有試打服務。
除咗提供乒乓球枱之外，仲有職員會陪你試打，我地就真係見到有個女士係度同職員對打試拍，功架十足，好有型﹗