二零二四年八月二十五日(星期日)
我地又飛喇~
今次搭早機，我地繼續搭UBER去機場，無辦法，UBER的服務實在比的士實在好太多。
機場正在舉行香港大自然風景相片的展覽，睇到真係好想去行山。
今次繼續搭香港航空，不過辦理自助登機CHECK IN時發生了一段小插曲。
話說我Scan完護照Search唔到航班資料，職員叫我出示返確認機票的電郵，機票日期是10月25日，當時10時26分，使用Garmin錶的職員衝口而出講咗句：「你哋張機票係聽日嘅」，大家被嚇得心都離一離。
同樣用Garmin錶的我好快回過神來：「1026係時間」，職員勁唔好意思猛咁Say Sorry。上圖為Garmin錶的顯示畫面，左邊的是時間，右邊週日下面的數字才是日期。
見到CHECK IN櫃枱排隊的長龍，我真係唔明點解唔用自助CHECK IN機囉~
辦好手續我們就去翠華食早餐
我食咗沙嗲牛麵炒蛋麵包，仲有我最鍾意的忌廉咖啡，不過真係好唔鍾意蛋上面的櫻花蝦。
我地竟然又同上次東京之旅一樣係216閘口登機呀~
今次航班都係無空中娛樂系統
仲要無熱食繼續食包，個素肉叉燒包又幾好食喎，而且最好的地方係素肉唔會硬唔會有肥肉唔會攝住牙縫，所以逸逸對個包完全無投訴。
大約三個鐘頭的飛行時間，除咗食包打機同埋睇我地預先DOWNLOAD定的片集之外，都花咗幾多時間睇香港航空本雜誌。依家已經唔係文盲的逸逸睇到津津有味，仲俾YSL的遮瑕筆所吸引，佢話入面寫住：「好似一支魔法棒，可以撫平毛孔瑕疵」，佢好想要一支嚟遮手臂的疤痕。
最後返屋企之後我搵咗支唔太啱用的遮瑕俾佢玩，哈哈~
因為香港的航班管制有點小DELAY，大約3:30PM，我們來到福岡機場了。
辦好入境手續拎埋行李之後，我們首先要聯絡租車公司派車到機場接我們。
根據以往慣例，去到外國打當地電話只要直接撥打當地號碼就可以，唔知點解打唔到。排隊去詢問處搵幫手，職員都係指我地去用公共電話聯絡。最後終於成功用公共電話先成功聯絡到租車公司，真係唔知幾多年無用過公共電話，好彩有硬幣咋~
我地今次與ORIX RENT A CAR租車，司機載我們去到機場附近的福岡機場口店辦理手續，簽好晒名俾晒錢收埋車，大約4:45PM就正式出發了。
第一站就係去博多運河城，駕車15分鐘就到，我們將車停在商場對面的多層停車場，在市區泊車無可避免要付費，今次泊車就花了600円。
依架就係陪我地玩咗七日的灰色車車
對上一次來福岡是剛剛好20年前，當年已經有Canal City，依個商場當年的賣點就係中間有條河，不過唔記得有冇去過。
今天我們只吃了一個包做午餐，所以來到CANAL CITY第一件事就係去吃EARLY DINNER。一場來到博多梗係要食博多拉麵，所以我們來到CANAL CITY的拉麵競技場。
依度有八間拉麵店同場技競
而我地就憑感覺揀咗初代秀ちゃん拉麵。
拉麵競技場內的店舖每隔一段時間就會替換一次，原來初代秀ちゃん拉麵不單是進駐最久的拉麵店之一，而且一直沒有被替換，實力可見一斑！
拉麵的豬骨湯底非常濃郁
底煎得超脆但係上面軟乎乎的煎餃子
兩碗拉麵、一份餃子再加兩杯飲品就是我們點的二人餐。
為逸逸點了一份兒童餐，不過對於這個拉麵迷，兒童餐真係唔夠食，另外兒童餐可以揀禮物，對於有選擇困難証的逸逸來說是苦差，好不容易才選了換衫貼紙簿，看來下次還是為她點一碗正常拉麵比較好。
後來看到可以追加炒飯我們又點可以錯過，拉麵店的炒飯又乾爽又惹味，恆仔話正過碗拉麵。