二零二四年五月十五日(星期三)
自從今年2月第一次嘗試跑青山公路結果去到大欖因為腳板底痛要放棄之後，一直都好想再挑戰，正好遇上屯門牛搞青公團跑，立即報名參加。
今次路線係由荃灣西跑去三聖，全程大約17公里。
下午4:30pm荃灣西起步
本來以為要練烈陽神功，點知曬得嚟好舒服，而且今日有啲涼風，好適合跑步。
多謝快腳師兄跑快啲幫我地影相
全程分別係機場核心計劃展覽中心、深井7-Eleven、屯門公路轉車站以及咖啡灣休息，除咗自攜250ml清水之外，深井同轉車站分別飲左一支保礦力和一罐雀檸，其實跑青公補給站很充足，唔帶水都ok。
好美的夕陽
今次最深刻的體會係我應該要專注自己的Pacing，原來太快同太慢都不適宜。太快其實係無本事，刻意放慢會加長腳板接觸地面的時間，感覺有點負擔，都係自己的Pacing跑得最舒服。
另外一個體會是我跑到去三聖之後竟然覺得要繼續跑感覺仲可以，只不過已經太夜要趕返屋企吃晚餐，似乎要完成半馬不是夢。
果然一班人一齊跑真係可以跑得更遠。