去年十一月尾和妹妹一起到台中參加臺中國際馬拉松，半馬拉松成就解鎖，兩天一夜玩得好開心，當時講過好想每年都可以一起去海外參加一場比賽。

直至今年七月初，開始是時候要確定今年的計劃。

今年四月去嘉義旅行時留意過故宮南院這個景點，但因為時間太趕未能前往，所以我就被故宮南院馬拉松吸引住了。

其實自從去年的臺中國際馬拉松半馬以及今年二月的香港渣打馬拉松半馬之後，我都有玩越野晚，其中比較辛苦的包括有COROS SPARK RUN 23K TRIAL RUN玩咗5個半鐘、迷你四徑-衛奕信徑17.4K玩咗接近5個鐘，以及杯靈雙渡14K玩咗6個半鐘，加上備戰上次臺中國際馬拉松時最長已經試過跑31.9K，所以今次我決定要向全馬挑戰，故宮南院馬拉松的全馬限時有7個鐘，比一般只有6個鐘的比賽時間較為充裕，本來只打算跑半馬的妹妹最後也決定跟我共同進退，一齊展開初馬的旅程。

我們7月9日正式報名參加比賽，今次繼續唔客氣地直接請阿高的朋友BONNIE幫我們轉帳付比賽費用。因為有去年出走兩日一夜的經驗，今年決定去三日兩夜，第一天妹妹放工後就搭黃昏機去台灣，第一晚先住高雄，第二天才搭車去嘉義，第三天早上比賽，晚上就搭飛機返香港。

報名之後就開始練習，今次我用了RUNNA制定了一個22星期的訓練計劃，中間加插了已經報名參加了的LA SPORTIVA ULTRA FISH N SHEEP 28以及全城街馬 – 半馬組，RUNNA會幫我調整跑量備戰，又特別為暑假的九個人‧去旅行 越南胡志明市頭頓之旅SET了VACATION，降低了訓練強度，我都要讚下我自己，今次真係跟個TRAINING PROGRAM跟得好足。

不過出發前還是很緊張，因為就算跟足PROGRAM，最長的距離也只是跑過32公里，最後10公里完全係一個UNKNOWN。雖然在訓練中感覺到7:10/KM這個配速似乎是一個可以持續地跑的配速，跑完32公里的時候亦感覺自己仲有貨可以繼續落去，但仲頂到幾耐仍然係令我在賽前感到非常不安……