二零二五年一月二十八日(星期二)

每年臨到農曆新年，都心思思想去澳門過年，今年係一再猶豫之下，終於在四日前才決定成行。

我們的港珠澳大橋澳門口岸轉乘計劃已經到期，自從2024年5月1日開始港珠澳大橋邊檢大樓東公共停車場恢復收費之後，要繳付每小時10元的泊車費令自駕去澳門的性價比大跌，所以我們也沒有再續期，今次去澳門就試下搭金巴。

恆仔同逸逸係屋企出發，我就係公司出發，透過GOOGLE SEARCH發現只要我搭K52去到望后石站行去屯門赤鱲角隧道轉車站就可以同兩父女搭同一班A33X，本來我去到巴士站先來一架機場巴士我都等多一陣上架K52。

點知去到望后石站，跑來跑去都搵唔到上屯門赤鱲角隧道轉車站的路，最後搭咗九十幾蚊的士去關口。

去到關口出境後原來直接分開兩個搭車的方向，一邊去珠海，一邊去澳門，這個安排非常清晰。

用自動售賣機買車票，成人票可以一齊買，也有很多不同我付款方法，但係兒童票要用小朋友版八達通先買到。

今日搭車的人唔多，基本上唔駛點排隊就可以上車。開車喇~

大約搭40分鐘車就去到澳門了，同金巴影返張相先。

4:49PM落巴士，落咗巴士就直接過關，不用兜上停車場搵車位泊車同埋行來行去，其實依個位又節省唔少時間，5:03PM已經去到車站預備搭車入市區。

已經第四次經港珠澳大橋過關，對於這兒的接駁交通已經非常熟悉，今次要去澳門半島所以搭102X。搭巴士付款可以用現金、WeChat、支付寶……本來諗住開通了WeChat可以用來付款，但唔知點解又開唔到個交通碼，最後用返掃CODE的模式一次過俾三個人車錢，但總站先可以用這個模式付款。直至去到今個旅程最後一趟巴士，我嘗試用支付寶再SET，終於開通了澳門巴士的乘車碼。

搭巴士有位坐真係好

今次我地BOOK了澳門半島的HOLIDAY INN，所以在永利酒店門口的仙德麗街站落車再行過去，5:50PM先開始CHECK IN。

今次間酒店房唔多OK，因為無晒禁煙房，所以一入房就成陣煙味，好討厭。晚上出街回來時特地叫人幫我地噴空氣清新劑，雖然幫助好少，但係都好過無。

其實澳門酒店真係好海鮮價，今次出發前四日先BOOK酒店價格都幾貴，只捨得住HOLIDAY INN。如果我夠膽出發當日先BOOK酒店，上網SEARCH過最多貴一兩百蚊但可以住GALAXY，但你係唔會知價錢會係越來越貴還是越來越便宜，可能最後係貴到唔捨得住都唔出奇。

出發搵地方吃晚餐，本來首選係酒店入面的餐廳。

我們被鐵板餐的海報吸引到，海報上沒有寫餐廳地址，我們搭的升降機(右上角)顯示只有在7樓有一家假日中餐廳，特地走了一趟一點也不像會賣鐵板餐，唯有放棄，後來再搭另一部升降機才知道原來現在4M層還有一家假日西餐廳，真係咁都得，你間餐廳無生意都係自找。

於是我地唯有出去搵食，來澳門都會想食葡國餐，記得以前在附近利澳酒店對面吃過一家叫做威記葡國餐都唔錯，於是向住依個方向走，期間入咗間舊式超級市場逛下買下飲品。

行到過去唔見咗威記葡國餐，有一家新口岸葡國餐就沒有營業，放眼望過去，依間忠成餃子王應該啱我地食。

我們的團年飯

餐前小吃

今晚的飲品 – 我支啤酒係慶祝澳門回歸25週年的特別版。

食餃子的調味品，因為枱面太細，拿取合適份量之後店員就會收走。

五彩皮白菜豬肉餃 – 味道正常，但係五彩皮實在太吸引，試下依隻顏色又想試下嗰隻顏色，好容易越食越多。

醬骨架 – 好惹味，連逸逸都鍾意食。

田園春餅 – 這個是被宣傳海報吸引到。

我最鍾意食依類自己包的食物，平日的北京烤鴨、生菜包、蜜汁烤方等等都係我喜歡的食物。今次這個田園春餅是青瓜、大蔥、芫茜加上濃味的肉醬，襯埋一齊幾唔錯。逸逸就食青瓜、大蔥和淨肉醬汁的版本。

本來擔心除了餃子之外逸逸不喜歡其他食物，所以這個牛肉青菜炒飯本身是最後一個讓她吃飽的防線，沒想過她樣樣都合胃口，結果她也只是吃了一碗炒飯就飽飽了。

這晚的團年飯食物質素很不錯，不過價錢也不便宜，四道菜盛惠$411.4，絕對不是我預期來到澳門吃中菜的消費。

Comments

comments