二零二六年一月十八日(星期日)
在還未出發去台灣跑我的初馬之際，已經報名參加了渣打馬拉松的全馬。
初馬時擔心的是那未知的最後10KM，經歷過初馬之後擔心的正正就是那已知的最後10KM：累到雙腳好似綁咗石頭，提高隻腳都無力，好辛苦先頂到最後……而渣馬更恐怖的是因為三橋三隧多斜而被稱為地獄賽道，即是更加辛苦﹗所以完成初馬回港後我就立即回復訓練，每次長課都跑青公練斜。
醜婦終須見家翁，無論點都好，終於來到渣馬正式比賽的日子，因為渣馬補給沒有台灣的比賽豐盛，以今次帶了四支GEL，仲帶埋撒隆巴斯噴霧，唔好彩抽筋都可以自救。
今早調教了4:20AM的鬧鐘，起身梳洗之後食埋早餐先出發。
初馬時早餐食麵包和香蕉好似幾唔錯，今早食了半個提子大麥包和一條香蕉，參考去年屯門牛友人阿KIM去到尖沙嘴食包好似幾好，今次我都再帶多四份一個提子大麥包去到尖沙嘴先食。
朝早搭地鐵的都是去參加渣馬的跑手
先在尖東站去個洗手間，第一次男廁大排長龍女廁唔駛排隊。
有去年參加半馬的經驗，今年在尖沙嘴做安檢寄行李都好熟路。
遇到一班來自韓國的跑手
上線之前再去多次廁所，今次去咗天星碼頭個廁所，又係男廁大排長龍女廁唔駛排隊，但係依個廁所超級污糟，下年都係走返落尖東站去廁所好啲。
一直去到起跑點都無見到熟人，搵咗個參賽者幫我影相。今年天氣唔凍，所以可以比較輕便，直接背心短褲就去上線，雖然對好多人嚟講今年太熱，但係依種氣溫其實更加適合我。
6:50AM起跑
今日的路線係由尖沙嘴出發，經西九龍公路去到大約美孚位置轉入昂船洲，登上昂船洲大橋去到青衣，跑過汀九橋去到屯門公路再折返，穿過長青隧道返回西九龍公路再經西隧過海去到西環，終點是銅鑼灣的維多利亞公園。
出發囉~因為我都算早上線，梗係會不斷俾人爬頭。在彌敦道有兩個快腳屯門牛師兄爬我頭時都有打到招呼，咁樣的相遇都唔錯。
一邊跑步一邊欣賞日出的美景，我想講去到大約美孚附近，已經見到早我50分鐘出發的全馬挑戰組勁人回頭了。
據說今年渣馬的參賽名額是74,000，而馬拉松的名額是18,000，這條由18,000人組成的人龍真係好壯觀，難怪全程KEEP住周圍都係人。
昂船洲大橋
今次每個補給站都有飲水同寶礦力，另外分別係大約8K、16K、24K同埋32K都食咗Gel，中間又食咗少少蕉，補給好似做得唔錯。今次我自己帶咗水杯，將義工倒好的水直接倒在自己的杯入面，又快又唔阻其他人，而且應該慳了起碼20個紙杯。
汀九橋超大風有啲難搞
我以為只係街馬先有官方安排的音樂表演，原來渣馬都有，全馬限定。
跑咗一半喇~
上個月初馬的時候因為唔熟條賽道，當覺得跑極都跑唔完時就覺得無論跑去邊反正點都要跑夠42公里先會跑完；但今次跑上熟悉的賽道，一條每個星期駕車都會經過的路，就發現當連跑多幾遠就會轉彎都知的時候，感覺係無咁遠的。
又有另一隊樂隊演出
點解要影唐三藏？除了因為特別的扮相之外，其實因為他是半馬三組的參加者，妹妹都有在家庭WHATSAPP群組跟大家分享過，阿DAY仲話跑全馬都唔夠取西經。今次都見到好多唔同扮相的跑手，例如SUPERMAN、IRONMAN、少數民族婦女等等，明明記得當時記低咗，但係到寫BLOG時唔記得咗記低係邊，哈哈~
渣馬水站義工做得真係好好，無論何時行埋去都有一堆裝好了的水，仲有每個站都精心設計，依個”寡人笑左”同”寡人笑右”水站係我心目中的冠軍。
預備入西隧喇~
繼續有義工為跑手打氣
義工幫我影靚相，依張相好有型。
好佩服依個財神，跑半馬都超級勁﹗
睇圍封依個都似係官方表演，不過因為中環沿路周圍都係表演，其實都唔係幾分得出。
最後直路喇~
我終於完成渣打馬拉松的全馬賽事，制霸成功喇~
靚靚獎牌
完賽之後同今日跑半馬的阿妹去咗金鐘撐枱腳，食咗美味的牛扒。
後記一：
今年領取選手包的日子正好約了朋友在啟德零售館吃飯，飯前先去拎選手包以及逛逛博覽會。
在外面入場前已是依照參賽項目排隊，聽到10K隊有個女仔同朋友講：有無發現排全馬隊的人身型都比較瘦。
IT’S ME
排隊影咗相，義工好有HEART，主動叫我扮唔同的POSE。
後記二：
梗係要同大家分享下靚相喇~
