二零二四年八月二十九日(星期四)
因為台風十號轉軚襲九州的關係，今日所有行程被迫取消，唯一的任務係安全地由嬉野去到鳥栖。
外面睇落又唔係好大風咁，雖然係咁講，但係食早餐之前我同逸逸去浸多次溫泉，外面啲風都係吹到竹簾啪啪聲~
浸完溫泉就去食早餐，我都係第一次一泊二食連早餐都有菜單，而且同晚餐一樣 — 水蛇春咁長的。
嬉野元湯溫泉旅館的早餐係我暫時食過最豐富的日式早餐。
依碟魚同鴨胸係我以為食物上齊影晒相開始食緊先上桌，份量多得好誇張，不過我仲誇張，因為可以全部食晒。究竟平日淨係飲咖啡唔食早餐的我係咪同一個人。
早餐的亮點一定係個湯豆腐，配佢預備的芝麻醬係唔錯，但係配唔知用嚟配乜的麵豉醬更加正。
就係下面個麵豉醬，超好食。
主食可以揀白飯或者嬉野茶粥，甘甘甜甜幾好味，至於口味保守的恆仔，當然係揀食白飯喇~
依個係逸逸的兒童餐，又係超級豐富。
今次有意粉沙律又有日式煎蛋卷，啱晒逸逸口味。
因為打風周圍都停業，原本今日的行程係嬉野的原祖忍者村、浮羽稻荷神社、朝倉三連水車和鳥栖Premium Outlet，依家就變成直接去鳥栖的酒店。太早去到鳥栖酒店未可以Check in又無地方可以落腳，所以我地係嬉野的酒店留到最後的CHECK IN時間 — 10am先走。
離開之前我地駕車去酒店隔離的便利店採購一下，買咗杯麵和麵包，起碼今晚同明早點都有嘢食唔會餓肚子。
真係好好彩今次選擇咗自駕遊，遇上各種狀況都可以Flexible好多，如果唔係今日都唔知點樣移動。
原本50分鐘的車程，用咗一個半鐘，全程不停的被強風搶軚，要打醒十二分精神同埋緊握軚盤，見到前面的雨水打橫吹過就表示將要進入強風帶，好似打大佬一樣咁緊張。
平日搶軚只有司機自己知道，今日係大風到乘客都感受到。
風最厲害的地方係公路兩邊都無山的平原，平日已經長期放置「小心橫風」的告示牌，打風要特別小心，依啲位一定聽話行50km/hr。
精神長期蹦緊實在太累，今日咁短的車程都真係忍唔住要入休息站。
除了上了洗手間，仲食咗一個美味的大福。
我們停靠係一個叫做多久西的地方。
如果唔係打風真係唔會係度停低
努力幫自己增添旅遊的樂趣。