二零二五年八月二十二日(星期五)
來到新酒店，都是在酒店的餐廳食早餐。
雖然我地同爸爸媽媽住一間房，不過都係各自落嚟食早餐。
逸逸自己出去拎食物
食物選擇都很多，不過味道就很一般。
今日我哋去DAM SEN WATER PARK，車程大約35分鐘，我地又係分乘兩部GRAB過去。
途經比較老舊的區域，由於塞車，所以我們花比較多時間在車子上。
大約10AM終於來到DAM SEN WATER PARK，它是一個當地人去的水上樂園，成人門票只要220,000盾（~HK$65），真係好抵玩。
可能因為入場費便宜，我地發現好多一家大細來玩會帶埋老人家，老人家坐埋一邊設立大本營，好似去公園乘涼咁，佢地仲會自備食物，咁樣可能仲抵過儲物加在餐廳買食物。
140cm是重要分界線，兩個細的小朋友毫無懸念，曉曉剛剛140cm，阿妹幫她買了成人票，最後卻未能玩到成人的玩兒。不過點都好，因為依個高度要求，好多小朋友在香港或者其他地方夠高玩的大滑水梯依度都玩唔到，曉曉同逸逸有少少失望。
入場後首先要去這個COUNTER買寄存票
然後再將行李交過去寄存就可以了
依個係水上樂園的地圖，可以去官網睇下介紹，水上樂園基本的遊樂設施配備都一應俱全。
第一站我地先去Children’s Pool。
小朋友覺得個兒童區好好玩，大人就只可以睇住小朋友玩。
如果曉曉玩到成人的玩意，就無得同兩個細的一齊玩兒童區的滑梯，所以未夠依度把尺咁高都未必係壞事。依度的救生員好盡責，剛來的時候曉曉有被救生員捉住度高。
依個係小朋友最鍾意的玩意 – Wandering River。
水流都幾急，一直俾水流推住去，唔用水泡仲刺激，如果好似香港個水上樂園咁可以著住助浮衣玩相信係最正。
依個Water Jet Massage我地只係經過不過無玩，最吸睛係大大的SIGNAGE叫人唔好係度疴尿﹗
我地去玩Wave Pool時沒有遇到浪，唔知佢幾耐起浪一次呢？
小朋友有兩個水泡滑梯可以玩，分別是Wild River以及Black Thunder Slide，恆仔有得唔玩都唔會參與，所以兩個都係我同逸逸玩。
又返去Children’s Pool
玩得好有隊型
我今次有新嘗試，就係同阿妹玩咗一個類似滑索的玩意，其實就係靠雙手扶住把手，滑到泳池中間就會有股回撞力令你跌落水入面，好似睇綜藝節目個種，在高台等待出發時都幾緊張。
滑索Show Time
我地玩飛索時，爸爸們就幫我地影相同打氣，公公婆婆帶住三個孫去Solar Water Massage Pool嘆下。
又嚟Wandering River，我諗佢哋淨係玩飄流河都可以興奮一日。
我和我的黏黏寶寶
影相位
本來諗住只係玩一個上午，但係小朋友意猶未盡，咁我地係水上樂園入面食午餐喇~
午餐好抵食，大約HK$20已經可以食碟肉醬意粉或者肉絲炒麵。
因為職員不懂英語，所以我們拍下菜單的照片點菜，相當有效率。
用餐的座位很足夠，也很乾淨，讚﹗
我就食咗牛肉炒麵
之後阿妹再去買咗啲串燒返嚟一齊食
食飽休息一陣大家又去玩多次WANDERING RIVER，妹妹帶住三個小朋友竟然超快咁前進走咗一圈，係後面追返我哋轉頭，勁！
爸爸媽媽拖住手慢慢散步，好溫馨。
上午兩個Slide都係我陪逸逸玩，下午玩多次時佢話要同表姐一個水泡，好喇，咁我同我阿妹玩喇～
臨走之前我同阿妹都玩咗兩個Slide
分別係滑梯出口成條龍咁既Green Dragon Slide同埋黃藍色的Space Bowl，速度都真係好快，我背脊直頭覺得熱熱地⋯⋯
拎返行李就換衫，我地無帶毛巾所以現場即刻買咗，兩條毛巾的價錢同入場費相差無幾，所以想貫徹平價玩法的話記住帶毛巾。
返酒店沖完涼好肚餓，我地落咗樓下便利店買零食做下午茶，HAPPY HAPPY﹗