二零二五年三月二十三日(星期日)
今天來到迷你四徑的第二回：鳳凰徑。
今次比賽第一個挑戰就係9am梅窩起步，即係大約8am去到比較穩陣，所以今朝5:30am起身，6am搭機場巴士入東涌再轉7am開的3M，順利大約7:45am去到梅窩。
可以係香港四徑超級挑戰的終點綠色郵筒打個咭
仲可以係麥當勞望住個海食個早餐先去集合
起點是梅窩的銀河花園，2022年去過梅窩玩咗三日兩夜，所以都知道位置。
今次的路線是梅窩→南山→大東山→伯公坳→鳳凰山→昂坪，全程13.5公里，攀升1487米，限時6小時。
屯門牛的朋友 — 今日屯門牛牛比較少，因為去晒參加揹水一戰。
今次仲遇到同事VINCENT
今次攀升同港島徑相比多好多
鳳凰徑
參加迷你四徑的其中一個目標是觀光，所以每個觀景台都要打下咭。
第一次來大東山，好靚，難怪芒草季會塞人。
原來大東山的屋仔是由傳教士建於1930年，屬私人財產。
影下僅餘的芒草
大東山二號觀景台
今日雖然又熱又曬，但係啲風好涼。
中段補給我飲咗一杯可樂三杯寶礦力，天氣太熱蕉同蛋糕麵包都唔太食得落，但係我食咗勁多橙，又甜又多汁。
仲拎咗個砵仔糕邊行邊食。
第二段是上香港第二高峰鳳凰山，16年前去過睇日出，雖然上次係行夜山，不過對條路都有啲印象。初段因為梯級太高腳又太累拉一拉左小腿抽筋，瞬間覺得自己會痛到行唔到，好彩帶咗撒隆巴斯噴霧，噴完好快就唔痛，仲要抽筋感都無埋鬆返晒，當然之後都有其他位置想抽筋，不過都無再噴藥都OK，真係要講一句：撒隆巴斯萬歲﹗
自始，撒隆巴斯成為我的長途賽必備神藥。
繼續係每個觀景台影相
我認得依個亭，當年我地上鳳凰山睇日出時係度休息過。
繼續不停地攀升，上極都唔完。
好靚的風景
終於去到鳳凰山的山頂
當年都係依度影過到此一遊相
上山容易落山難，今次落山條路勁難行，腳震無力當然會令條路變得更加難行，不過相片中的位置不算難行，因為難行的路無餘力影相。
回憶中16年前因為趕住去廁所要飛奔落山，今日再見返條路諗唔明點樣可以飛奔，因為今日的自己只能用龜速慢慢行。睇返當年個blog用咗一個鐘頭落山，今日的我只係用咗45分鐘，原來只是這兩年的練習讓我對速度的感覺不同了。
終點衝線前竟然仲有幾級樓梯
最後跟錶4小時50秒完賽，但係移動時間只係3小時3分鐘，雖然Check Point食嘢係停得耐耐地，又每個觀景台都有打咭，同抽筋時停咗一陣，但肯定無1個鐘，唔通落山時搵落腳位都當我休息緊無移動？
本來差不多落到山腳見仲有10分鐘想趕係4小時內完賽，但係落到去心經簡林先發現仲要跑一段，但係個段有幾長我又唔知，如果清楚目標應該趕到，所以依個位有少少遺憾。
全場：235/463 女子：63/155 組別：11/25 DNF:29
迷你四徑完成兩徑了﹗
係終點飲咗兩罐可樂食左一串魚蛋一串燒賣同埋好多橙。
好耐無搭過昂坪360，雖然貴啲但可以坐得舒舒服服，而且員工有75折好似好抵咁，仲有，都算係獎勵我自己今朝好叻無搭的士或者Uber，返到東涌同兩父女係東薈城食午餐。
當然要同大家分享下比賽靚相
