二零二五年六月二十九日(星期日)
2022年的時候曾經特登去香港仔食艇仔粉，反而唔知原來屯門都有得食，多得屯門牛攪依個活動，今日我絕對係為咗艇仔粉而跑。
今朝8:30am深井集合，深井交通實在好唔方便，最後係要坐55號再轉952號巴士。
為了唔遲到另一選擇就係未夠8:00am就要到，最後起步前係深井食咗個上海早餐。
大家精神奕奕的出發
跑呀~主題其實關飛圖咩事？就係有人會一路播住飛圖年代的歌一邊跑囉~
究竟依個28係咩意思？原來係回歸28年。
屯門公路轉車站係第一個休息點
繼續前進
第二個休息站就係黃金海岸商場
10:20AM就來到終點青山灣海濱長廊
由深井跑去三聖，後來食完粉又由三聖跑返屋企，好似係上次本來打算由荃灣西跑返屋企最後因為傾盆大雨而係深井跳船的延續。
艇仔粉沒有定時定點出沒，要打電話同佢地預約。
艇仔粉可以自選麵底和配料，麵底可選河粉、油麵和生麵，配料則有雲吞、魚蛋、紅腸、燒鴨同埋雞翼，即叫即煮。
我揀咗雲吞燒鴨河，買完就去咗三聖邨涼亭坐低慢慢食。老實說碗粉沒有特別好食，也沒有不好吃，就是普普通通的質素，主要係食食風味。
今日天氣太熱，食粉之前已經飲咗超過2L水/飲品成肚水，當時只係10:30am早餐都未落格，碗粉仲要超級大碗，我哋當機立斷三個女仔Share兩碗，最後都食唔晒。
食完粉順便跑埋返屋企，反正跑同等車連搭車時間差唔多。