二零二四年六月二十九日(星期六)
太耐無試過一大班人瞓埋一間房，整個晚上都有不同的聲響，好像沒有怎麼睡過又要起床了。
每朝都要飲咖啡，雀巢咖啡其實又甜又無乜力量，不過好過無咁喇~
今朝我地打算去玩射箭同埋繩網，小朋友就可以玩兒童歷奇，昨天前往戶外場地的斜路封閉了，要改行又落山又上山的梯級，雖然鳥語花香水聲潺潺，但係一日來回幾轉都幾辛苦下。
去射箭之前先SETTLE班小朋友，根據資料歷奇區明明係自由參加的項目，準時9AM去到卻沒有開門，打電話去俾職員回覆話有職員嚟緊但等極都無人到，最後我地自己推門入去玩。
兒童繩網陣適合2-12歲小朋友參加，對於7歲半的逸逸都有挑戰性。
小朋友要在成年人的陪同下使用歷奇區，恆仔昨日已經射咗箭，所以負責睇住小朋友。其實依度仲有個飛索，但係鎖住咗又無職員過來開所以無得玩。
原本我地去射箭，點知上到去話要維修，我想講其實成個曹公潭的管理都係一塌糊塗，結果大人都落嚟一齊歷奇。
阿DAY同阿妹不甘寂寞，本來打算BOOK籃球場打下籃球，點知有團體BOOK咗籃球場練習排球，最後BOOK左網球場。
第一次打網球的逸逸，好明顯完全唔夠力。
我已經超過二十年沒有打網球，大慨的感覺都仲係度，近排打慣乒乓波的我覺得個網球場真係好大，同阿DAY對打左一陣都幾過癮。
我同DAY打網球，小朋友已經熱到頂唔順要飲野同返去室內涼下冷氣。
打完網球剛好見到繩網重開，即刻去玩，不過因為早前天雨，只係開咗第一至第六關。
可能因為近年體能操得都幾FIT，所以係好好玩的EASY JOB。
玩完繩網返到去趕得切JOIN第二梯隊逸逸同詩詩一齊玩攀石
平日又怕痕又怕痛的逸逸竟然一邊大嗌媽咪一邊爬到上頂，好叻女﹗之後教練仲特登拉住我講話逸逸係夠晒力自己完成，佢亦無幫過手拉佢，所以佢需要的是戰勝自己的恐懼，叫佢唔駛嗌。
對於玩開空中瑜伽的我當然係輕鬆完成喇~
體力勞動完休息一下，我地係小賣部坐低，我同恆仔食甜筒，逸逸食燒賣。本來我見到小賣部有LATTE賣兩眼發光，仲想問佢可唔可以走糖走奶，點知職員話其實係三合一咖啡無得走糖走奶，咁算喇~
午飯前係兒童遊戲室由阿DAY帶住班小朋友一齊嘆住冷氣玩集體遊戲，到兩個半月後的今天逸逸仍然對於「蒙羅麗莎」遊戲仍然津津樂道。
今日的午餐係妹妹一早預訂好的飯堂點心，味道都唔錯，比飯堂四餸飯強得多，亦夠晒飽。除咗個炒飯超唔得，生米又無味，應該可以入我食過的炒飯BOTTOM 10。