二零二四年十二月二十八日(星期六)
因為恆仔同唔到我地去桂林，雖然仍然坐在前往桂林的高鐵，已經決定了回香港後的WEEKEND要一家三口一齊去露營玩返兩日一夜。
聖誕節是露營旺季，好多熱門的收費露營場已經爆滿，終於找到了看起來唔錯而且仍然有位的摘星山脈，依度仲未FULL的原因除了因為地方夠大之外，特別日子價錢都真係幾貴，成人$330/位，小童$280/位，草地泊車$300，我們一家三口自攜營都盛惠$1240，好彩逸逸識得欣賞，起碼會讚依度個營地廁所係我地去過最豪華的。
營地位於錦田鄉村俱樂部停車場的盡頭
可以泊車的露營草地都好闊落，如果唔泊車就可以上山有梯田式營地。
恆仔負責起營，我地個位離廁所同雪櫃有少少遠，不過旁邊就有洗手盆，已經非常方便。
我同逸逸就夾手夾腳SET傢俬
行上少少望返落去大草地
依個就係逸逸口中的豪華浴室，不過因為天氣太凍了，所以我地無去沖涼。
露營例牌節目：畫畫。逸逸超快速就完成她的作品，淨返我係度慢慢畫。
逸逸身後樹林都可以露營架
我咪就係畫依個樹林囉
今日好好風，好適合放風箏。
玩到太陽開始落山
趁未天黑捉埋兩父女入去樹林影下相先
下次揀泊車入停車場唔落草地，就可以試下樹林露營。
影完相又返去繼續努力，天幕、彩旗同埋掛燈都搞掂了。
不能停下來一秒的逸逸唔玩風箏就玩飛碟。
突然見到一班山羊返屋企
好美的天空
我地都開始預備煮晚餐了
通常我地都會先食下零食先，包括我係台中帶返嚟的煎蛋味薯片
同埋朝早係惠康見到大特價只係幾蚊一包的栗子味KIT KAT
對上一次露營已經係2023年11月，期間去旅行時都添置了新裝備，所以今晚菜單是為了用到新裝備而設計。
新品介紹：
摺叠鍋 – 購自福岡ALPEN
搖曳露營盤子 – 購自東京某書店
迷你戶外用SALT & PEPPER – 購自澳洲ULLADULLA戶外用品店BCF
今晚好大風，我地個風擋都唔係太夠用。
晚餐菜單：關東煮、煎牛扒、煎燒賣芝士腸蕃茄仔、蔥油餅，其實個關東煮極其簡陋，不過當天氣好凍的時候有一鍋熱騰騰的湯真係好正﹗另外，牛扒真係一分錢一分貨，要謹記下次唔好再貪便宜貨。
露營當然唔少得飲返杯酒喇。講到杯，隔太耐無去露營就梗係會帶漏嘢，今次竟然唔記得帶杯，下午無得飲咖啡，飲紅酒都要好豪氣咁直接飲。
又便宜又甜的韓國士多啤梨，難得百佳都有正貨。
食完水果無耐逸逸又話要食杯麵，佢話早啲食完早啲入帳幕玩喎~
唔食蝦的逸逸話蝦湯杯麵好好味
逸逸食完麵我陪佢入帳幕玩，玩咗陣UNO，又玩咗陣iPAD，恆仔就係外面執嘢。逸逸都未眼瞓就到恆仔都話想食杯麵，於是逸逸自己一個係帳幕玩iPAD，我就出咗黎食麵。
我帶咗係日本帶返嚟的嬉野茶打算沖茶飲，但係無杯點算好？恆仔自有妙法。
恆仔洗乾淨咗逸逸剛才食杯麵個杯俾我沖茶飲呀~我可以一邊嘆嬉野茶一邊食咖哩海鮮杯麵。個杯仲要留住今晚同聽朝全家刷牙同埋明天早餐沖咖啡……
今晚好多星星呀﹗
今晚都凍但未算超級凍，但係超級大風，我地仲要唔記得帶暖包真係弊傢伙﹗雖然上網睇話今晚開始進入象限儀座流星雨的活躍期，但係都係早啲LEE埋入帳幕取暖好啲。
GOOD NIGHT~