因緣際會，兩年前加入了海景嘉福酒店的SIGNATURE CLUB，因為我們一家都喜歡吃Buffet，Cafe on M的食物都幾啱我地口味，亦藉此機會試了中餐廳海景軒，我地午餐去飲茶，食物雖然貴但真係好好味，所以會藉完咗之後我都有續會。
今年續會禮物是星期一至四Buffet Dinner兩位，另外自己生日以及兩個自選特別日子都有Surprise Coupon。恆仔生日的時候我地去了食Buffet Dinner ，因為是星期五未用到免費Buffet Coupon，但我們也享用了特別為配偶贈送的香檳以及蛋糕；小孩生日的禮物是小童免費 Dinner Buffet，9月初的時候我還檢查過一次張Coupon已在App入面，到9月下旬我預備Book枱為逸逸慶生時發現手機App的Coupon唔同晒，唔見咗小童免費Dinner Buffet Coupon，原本星期一至四Buffet Dinner 亦變咗意大利餐廳The Mistral的星期一至五Semi-Buffet Lunch，我特地打電話去查詢，原來Cafe on M已經悄悄的臨時暫停營業。
會藉的Coupon點都要用，我們在結婚週年試了The Mistral的週末Brunch，真係好好食，不過恆仔麻麻地啱食；免費Semi-Buffet Lunch Coupon送咗俾爸爸媽媽二人世界撐枱腳，他們都很喜歡，仲話食完好想去外國旅行。
來到會藉的最後一個月，還有3張$500 Coupon未用，星期六再次光顧了剛剛裝修完的海景軒。因為價錢太貴的關係，感覺應該是最後一次幫襯了，特別想試試他們的推介，所以試了這兒的嘉福行政午餐。
Signature Club Member 每位$375，計埋茶錢加一，埋單就差不多$1,000了。
五糧液桂花蜂蜜叉燒、香蔥海蜇
第三次食依度的叉燒，真係好好味，又嫰又香甜，香蔥海蜇都唔錯，終於吃到小時候印象中的海蜇口感。我地討論到近年在酒樓食燒味拼盤或者街買回來的即食海蜇口感好奇怪，唔知係咪真係食緊海蜇。
松茸燕液灌湯餃
對於灌湯餃無乜認識，唔知依個餃算唔算好食，不過佢唔係會令我念念不忘的點心，但係個湯非常好飲。
藏紅花筍尖蝦餃、黃耳帶子餃 (鮮蝦和帶子都非常鮮甜)
蒜香鮮蝦春卷
咁多個點心入面最有驚喜，香脆不油膩，吃炸物竟然都可以吃起來非常輕盈。
魚湯杞子浸時蔬
蟹肉荷葉飯 (依個係另一個Highlight，味道好細膩)
石榴椰果甘露(石榴味好出，好有特色)
好美味的一頓午餐，雖然話可能最後一次來，不過如果有人請我食的話我一定會再來。