二零二四年十二月十五日(星期日)

今次係我第一次玩23K超過1000M攀升的山賽，同妹妹玩Female Team組成「二胡奏山歌」一齊玩。

比賽的起點是西頁北潭涌，8:15AM起跑，所以揀咗加錢搭大會係屯門V City開出的Shuttle。Shuttle開車時間是6am V City開出的Shuttle，所以5am起床，梳洗換衫食咗個飯糰做早餐就出門了。

離開屋企時只係5:25am

今朝得10度，體感只有5度，好凍。

咁早未有車搭，直接由屋企跑了2km去V City，唔知點解當時又無諗過踩共享單車喎。

跑完都仲係好凍，去到雅見仲有啲時間，入麥當勞買了杯熱咖啡。

去到北潭涌傷健樂園時都未夠7點，我地8點15分才起跑，凍到震決定要係小食亭買嘢食。阿妹食咖哩魚蛋，我就食餐蛋麵，麵底係福麵，好好食，再一人一杯熱朱古力。

雖然食麵依個決定只係因為太凍，但慶幸我係度食多個麵，如果只係靠今朝個飯糰真係唔夠能量。

搵到我地個名喇~

去到最後一刻先寄存行李，因為寄存行李就意味住我地要同件羽絨講BYEBYE，亦係依度領取埋大會送的可重用矽膠摺叠水杯。

起點遇上屯門牛牛

依個係我地今次的路線，限時8小時，報名時我地寫預計5小時完賽。

預備起步，今日預備咗2支500ml水+1支500ml寶礦力，一件Protein曲奇和兩粒芋頭餅。

選手包入面的順利完走御守我帶埋係身。

無諗過原來頭段全部都係石屎路，有如路跑只係上斜相對比較多，可跑性甚高。

在路上又遇到屯門牛的朋友

我只知道萬宜水庫東壩係今次比賽的唯一一個check point，但無留意到原來仲係香港地質公園的一部分，我竟然跑山都可以欣賞到六角柱石群和海蝕洞。

香港的山我其實行咗好少，每次山賽對我來說都係觀光，所以當然唔可以錯過影招牌相。

我同妹妹之前只參加過大約10K左右的山賽，攀升唔超過500M，本來以為距離多一倍攀升多一倍好合理，因為無好好做功課，無諗過我地1小時8分鐘已經到達10K check point，估計頭段攀升只有大約200米，飲飽食醉之後先係主菜。

Check Point的補給好豐富，飲品除了水之外還有可樂、橙汁和ta電解飲品，食物則有麵包、蛋糕、朱古力、蕃薯、香蕉和蘋果。除了補充水樽的水之外，我係度飲咗一杯可樂兩杯橙汁食咗兩個蘋果一粒蕃薯，仲拎走咗一件蛋糕一陣有需要時食。

好美的浪茄沙灘

我地其中一段路就係喺浪茄沙灘行沙灘

西貢有山有水，風景好靚。

途中遇到好多不同的路況，好有趣，我覺得自己落山大膽咗好多，落腳亦快狠準咗。不過尾段俾碎石跣低咗兩次，見到碎石又即刻驚驚青青的步步為營。

今次主辦單位的引路絲帶好清晰，見到條路的盡頭竟然要踩石過河仲以為行錯落，這個念頭一出就看到引路絲帶。

我們上山的路

翻過一個又一個的山頭

行咗唔知幾多段依種石路

行到手指腫晒

可以一邊行一邊傾計好開心

最鍾意就係兩旁都係樹的小徑

後13K我諗有超過800米攀升，即係上山落山無限Loop，Loop到最後500米先離開堆山返公路，不過難得的係最後仲跑得郁，多謝攝影師捕捉到我們衝線時興奮的一刻。

拎咗完賽獎牌，食埋完賽小食，上網竟然見到我哋的數據仲係話未完成，慢過我地到的參賽者都已經有記錄，即刻去問職員，好彩有資料，只係唔知點解未上到數，最緊要唔好變DNF。

簡單得來很美的木製獎牌

大會完賽時間是05:29:43，如果中途阿妹唔係肚痛會唔會快到半個鐘？不過速度真係唔重要，開心最緊要，下次再一齊玩。

完賽食物每人一份，包括咖哩豬皮魚蛋、咖哩蘿蔔、腸仔和茶葉蛋，另外還有麵包、香蕉、蘋果和牛油果任食。飲品除咗Check Point提供的飲品之外，還有啤酒和蘋果梨酒。

現場不提供餐具和杯，選手包禮物入面送了重用餐具，今早派的矽膠杯也大派用場。

依隻蘋果仔好好食，我以前唔知食咩牌子好淋唔鍾意，所以見到依種蘋果仔通常都唔會買，點知依隻牌子咁好食，後來去超級市場睇先發覺價錢貴到唔係好捨得食。

拎50K Mixed Team Champion個女仔用獎杯裝蘋果仔，我用膠杯。

換好衫我地就搭UBER返屯門了。

---

同大家分享一下攝影師的靚相：

Comments

comments