二零二五年五月二十四日(星期六)
杯靈雙渡是一條橫越青山(杯渡山)與圓頭山(靈渡山)山脈的路線，由屯門青山禪院起，先後跨越青山及圓頭山，再下降至靈渡寺，是山界考牌路線之一，最出名就是好多我最怕的浮沙碎石。聽到屯門牛攪郊遊團，講明係慢慢行，我見自己話晒都完成咗迷你四徑的四次考驗，膽粗粗報名參加。
早上約咗8:30AM在青山聖彼德堂集合，我在兆康兩合吃過早餐本來打算搭輕鐵過來，不過突然發現趕不及，於是改搭西鐵去屯門站再轉506，準時報到。
超過20人的團隊出發囉~
我其實真係行山初哥，當我身邊的人是一日三登五登青山之際，今次我只係第三次上青山發射站，仲要係第一次日光日白的來。
起步時都無咁多人，加埋一大堆後追的勁人，發射塔旁邊標高柱塞滿咗人，好誇張﹗
有幸同青山之王一齊登青山，梗係要R合照﹗
由青山落良田坳係我第一個難關，我最怕就係落山，尤其係咁斜的浮沙碎石路……
我本來是在中游位置，但係越行越慢，落良田坳個段路落到我懷疑人生……
最後做咗包尾大隊長，回望後面條路，我剛剛就喺依條路落嚟，實在難以置信。
一到咗大家集合的平地我立即坐在地下休息，今次我帶咗2L水+1L結冰寶礦力+250ml蔬果汁，另加兩包結冰糖水以及兩個飯糰，一坐下我飲咗啲水之後立即食咗包糖水補充下體力。
杯靈A隊一早已經繼續上路，淨返係度的部份人會在這兒離開，部份人就係之後陪住我慢慢行的杯靈B隊隊員。
依度係我的人生交叉點，山系大佬見我行得咁辛苦有問我仲繼唔繼續，我當刻其實都有一絲猶豫，但係我已經預備晒要挑戰的心情，而且如果揹住仲係咁重放滿晒補給的背囊落山我一定會後悔，所以決定要繼續挑戰﹗
我哋就係由青山一路走過來
過咗良田坳之後，我覺得我們是在爬山而非行山，長時間都手腳並用，經常坐住落山，好彩帶咗手套，但都俾石頭撞到瘀咗。
風化非常嚴重
最後一個山峰-圓頭山，依個時候已經行咗五個鐘，我因為肌耐力不足連上山都變慢，加上每一級石頭都好高，有一段我基本上係手腳並用咁爬上去。
見到深圳灣大橋 – 雖然我地行咗好耐，但係山下面的風景其實都係熟悉的屯門去到洪水橋，如果路跑一個鐘頭乜都到，哈哈~
我行得實在太慢，多謝屯門牛牛的照顧和在每一個休息點耐心等候~
落山其中一段要鐵鏈輔助
最後落山的路其實唔難行，但係我已經無晒力，所以都苦不堪言，好深印象係其中一個位有棵樹攔腰阻住條路要蹲下身走過去，那一刻我真的有點崩潰，因為雙腳已經無力蹲下來了……
終於到了終點靈渡寺，全程花了6個半小時，真係超級辛苦的一次挑戰。
杯靈B隊順利完成，雖然好辛苦，而且成為別人的負累，但總叫做考牌成功。
計埋由靈渡封仲要行多2公里先出去搭車，依一日總共行咗14.33KM。
記錄1：今次我帶的2L水+1L結冰寶礦力+250ml蔬果汁全部飲晒，好彩今日天陰有啲風仲落咗陣雨，烈陽的話真係唔夠水飲。食物方面，我帶咗一包結冰喳咋一包結冰綠豆沙，再加上有在良田坳切的牛牛俾咗包紅豆沙我，又係全部食晒，反而今早特地買咗兩個飯糰，又熱又累真係唔想食。另外我仲食咗一支上次行迷你四徑衛奕信徑食過的gel，今日好似無咁難食。
記錄2：今日跌倒過一次，左邊大脾瘀咗一大撻，手掌因為快速扶住石頭輔助落山的撞擊力又係瘀咗，另外黑咗三隻腳趾，所以尾段點會唔腳痛呀~