二零二五年二月九日(星期日)
在還未去台灣跑我的初半馬之際，已經報名參加了渣打馬拉松的半馬拉松。不過今次狀態明顯同上次台中初半馬差好遠，首先是12月病了一段時間，1月初環島行中暑暈一暈之後好多嘢都就住就住，之後又過農曆新年食多過郁……仲有，上次練台中半馬時跑過一個32K，心態上係充滿信心；今次長課最長只係16K，而且個次跑得有啲辛苦，所以今次係有點不安。不過唔緊要，最緊要好好享受比賽的過程。
今天5:40AM起床，在家吃了一個飯糰做早餐，大約6:15AM就出門了。
天都未光就出門，今早很冷，我要著厚褸出門先頂得順。
約了同是半馬二組的屯門牛KIM一起搭車，成車都係去跑渣打馬拉松的人。
我們在尖東站落車，根據去年的經驗，起跑位置附近的洗手間清潔度都非常慘不忍睹，為免重蹈去年使用流動廁所的惡夢，今次係尖東站去咗廁所先，又大又乾淨，雖然排長龍但因為格數多，等候時間不長。洗手間內的洗手盤旁邊還有一些枱面，我們直接在那兒掛好號碼布和脫去厚重的大褸和長褲，以及打包好要寄存的行李。
成個背囊放入寄存袋入面，今次知道唔可以寄存液體，所以今年連水樽都無帶了。
過好安檢之後就寄行李，直接寄行李上小貨車又幾有效率喎﹗
同KIM一齊上線
雖然在尖東站上了洗手間，不過上線時已經又有少少想去廁所、可能係心理作用，個少少想去的感覺keep到跑完，到完賽就唔想去了。
今日天氣好凍，除左背心短褲我加咗手袖和風褸，臨上西九龍公路已經要除風褸，入西隧除埋手袖，完賽即刻著返件風褸，安排好似唔錯。
今次半馬的賽道，可以用雙腳走過彌敦道、西九龍公路、西隧、中環鬧市，原來彌敦道路面很爛，原來西隧沒有別人說的難和恐怖，原來金融區沿路超級多人打氣好有嘉年華會的氣氛。
前面橙黃色的係盧巧音，我話晒都同佢並排跑左十幾米，不過之後就追唔上了。
基本上渣馬跑手實在太多，頭10K總算開始慢慢拉開距離就同全馬跑手匯合，在擠迫環境爬頭和被爬頭基本上由頭Keep到落尾。不過以無乜PACING壓力的我來說，沿路跑得好舒服，水站的位置恰到好處，每到我差唔多想補水就見到水站，飲完運動飲品又充滿力量。
原來係西隧入面怪叫係渣馬傳統嚟架
熱烈的打氣隊
西隧上斜其實又唔係好斜，反而天橋甘啲，不過短又好快過。
終於完成了﹗
我的第一個渣馬半馬獎牌
去年10K Pacing係6:40/km，明顯睇到自己的進步。我個Pacing整體都keep得幾好，其實過左西隧之後持續塞人，想加速都唔容易。
完賽NET TIME是2:11:35，我都唔知今次算唔算PB，上次臺中半馬根據手錶數據唔足半馬，今次渣馬就多過半馬，所以計Exact時間無乜意思。不過上次平均配速6:07/km，今次係6:05/km，都算PB了吧！
又遇返同我差唔多PACING的阿KIM
後記一：
今年渣馬去啟德體藝館拎選手包，順便參觀香港新場館，兩父女陪我一齊去。
隔離會場同時舉行馬拉松博覽會，非常熱鬧，不過亦因為人太多，我地都無排隊玩遊戲換禮物。
搵到我個名了﹗
點都影返張打咭相
憑號碼布去啟德零售館的屈臣氏可以免費換紙巾一條
後記二：
上次跑10K完全無相，今次跑半馬就多好多相了，而且今次發掘到了跑步維生素，原來好多內地攝影師特地來香港影相賺錢的。
搵唔搵到我？
後記三：
用ADIDAS APP可以免費係渣馬跑TEE上面印字，我特地出尖沙嘴印咗HALF MARATHON FINISHER字樣，好有紀念價值。
