二零二六年四月二日(星期四)
在私人場地玩咗幾次露營之後，開始心思思想去返貝澳露營，因為2012年曾經同阿DAY阿妹去過，可以跳入海中游水好正。不過要去離島露營就要輕裝上陣，我地平日玩開車泊係隔離的重裝備真係搞唔掂，所以我一直留意住搵機會試下交通比較方便的輕裝露營地點。
我儲的年假太多，今年復活節決定由第一天開始陪逸逸放復活節假放到尾，後來終於定了旅行會過了復活節才出發，上網查一下發現人稱新手友善又可以預約的荃錦營地有位，於是就讓我們重回免費政府營地的懷抱了。
今次預備了三個大背囊，逸逸已經長大都要幫下手。營幕、天幕是必備，枕頭同埋蛋殼墊都一定要帶唔係瞓唔著覺，因為天氣開始熱無帶睡袋，淨係幫逸逸帶咗張毛巾做被，不過最後有後悔。廚具方面，我地個鑊係好重的鐵鑊要帶埋佢搞唔掂，加上現場有BBQ爐，所以今次決定夜晚BBQ第二朝食杯麵，不過要煲水，所以都要帶GAS爐同埋水煲，屋企有啲菜，所以都帶埋之前係日本買的輕便摺叠湯鍋。當然BBQ要帶叉同埋炭又係另一個負擔，不過起碼唔駛帶返屋企嘛~另外，因為現場已經有桌椅，所以我們只帶了兩張露營櫈。
為了貫徹預備去離島露營，本來我是打算搭公眾交通工具去營地的，但係當我地搭地鐵去到荃灣西站之後，發現要等差不多一小時才有巴士，於是唯有轉乘的士直達營地了。
我們差不多5PM才到達營地，用身份証登記後職員就會給我們一個紙牌吊在營地的位置，表示已經登記入住。另外，職員又給我一張儲印仔咭，預約後又準時到達就可以蓋一個印仔，蓋滿一定數量印仔可以換禮物~
原來唔帶炭上來都可以係營地服務處買柴。
我們預約了27號營位，因為不了解現場情況，原來27號營位位於中間而且係最高點，無論由服務處出發，定係行一大段麥理浩徑第9段再由露營區5上去，都避唔開要行一大段長樓梯。
出發喇~由依個位行去我地個營位要行接近150級樓梯，最辛苦就係搬架買餸車上去。
荃錦營地係木板營地，我地特地添置了魚骨釘。
露營區2竟然有牛，我地仲見到牛疴屎添，好彩依個係待修的營地，如果佢疴係我地營地隔離就閉傢伙﹗
成個營地只有一個水源就係營地服務處旁邊，所以我地要去打水。唯一一個廁所就在水喉旁邊，雖然只是流動廁所，雖然是有點臭味，但整體都好乾淨，而且每次去都有廁紙和有水沖廁，比私人營地經常遇上塞廁所感覺反而仲好。
我地返到上去恆仔已經搭好個營
大帽山果然好大霧
因為天氣麻麻地擔心落雨，開頭是打算起天幕，可能太耐無露營太耐無起天幕技術生疏咗，搞極都搞唔掂，天又開始黑，最後決定放棄。
坐低食下薯片好過
起爐BBQ恆仔係專家
竟然俾我地見到一粒星星，實在太好了﹗
食物都係簡單嘢，都係今朝係屋企附近街市凍肉舖買了一些丸、腸同埋扒，味道整體都OK，係個牛扒好難食，下次唔好再幫襯佢買牛扒。
逸逸依家燒嘢食已經能夠自給自足了。
露營點可以無酒？
今晚我地的基地
休息一陣食埋杯麵做宵夜
除了露營人士的燈光之外周圍完全無光害，唯一的光源就是偶爾出現的月亮，所以入夜之後去親廁所真係一定要帶電筒，同埋都係一家三口一齊行動﹗
雖然跟私人營地相比，好多設施都無咁方便，但係感覺同大自然更加接近，其實都另有一番風味。