二零二六年四月三日(星期五)
晚上的荃錦營地原來好嘈，除了風聲和鳥鳴之外，還有討厭的飛車聲音，還要駱驛不絕，附近肯定是非法賽車的勝地。另外，今次諗住天氣熱無帶睡袋，得件薄外套，原來晚上的大帽山超級凍，我要攬住逸逸瞓取暖先瞓得著。
今天起床又一家三口一齊出動去洗手間同埋刷牙，昨晚半夜5點疴夜尿時因為全無光害周圍黑沉沉，逸逸每步路都要小心翼翼拖到我實一實，結果一天光就好似隻甩繩馬騮咁一支箭咁跑咗去，仲要話：媽媽，你咁慢㗎，烏龜都快過你呀！
因為帶唔夠食水，無諗過最後連去露營都係去搵連姐補給。
捧住支水返營地，我哋有早餐食喇～
由連姐行返營地，特地試下露營區5個邊的入口入去，依邊要多行一段頗長的石屎路，但係梯級就少好多。
依家起緊正式廁所，起好之後荃錦營地設施會更齊備。
今次只帶咗橡筋繩同埋飛碟嚟玩，都叫樣樣都玩過下，逸逸兩樣都比以前進步咗。
煲水淥杯麵
開餐~今天是受難節，我們要守齋，不過買杯麵時無諗清楚，覺得杯麵就是吃不同口味濃湯的淨麵，所以我買了雞肉麵，點知原來合味道杯麵原來配料都幾豐盛，我要特地揀走啲雞肉……
食完麵就煮埋係屋企帶來的芥蘭以及昨晚BBQ剩下的魚蛋。
當然唔少得我的MORNING COFFEE了
輕裝還輕裝，我都帶咗畫簿嚟畫畫。
時間差不多就開始收拾行裝，我帶逸逸落去5號營區的入口將垃圾筒指示給她，之後就由她負責上上落落，將垃圾及回收物帶落去，大個女果然幫得手﹗
我們準時11點離開營地，因為已經太疲累，所以直接CALL UBER返屋企。