二零二六年十月三日(星期六)
又一年海洋公園哈佬喂。
今年又遇上逸逸學校家長會，搞掂晒食埋午餐先出發，嚟到海洋公園已經差唔多2pm了。
既然是HALLOWEEN主題，雖然我地目標唔係玩鬼屋，點都影返張招牌相。
逸逸一心嚟到就想衝上山玩機動遊戲，但係我好想探下家姐細佬先。
一嚟到就入咗四川奇珍館，點知原來入面住的是安安和可可，不過牠們都好可愛。
我想再去埋大熊貓之旅，逸逸已經不情願，好彩我堅持成功，見到可愛的三母子。
WE LOVE PANDA
睇完熊貓就搭海洋列車上高峰樂園玩機動遊戲。
前年仲係只玩到極地時速同埋熱帶激流，去年三號風球所有機動遊戲停駛乜都無開，今年已經長高到大部分機動遊戲都玩到了。
所以今年海洋公園的玩法已經唔同晒，我哋終於無再去威威天地的遊樂場喇！
一嚟到先玩咗迪士尼彈弓狗瘋狂版的雷廷節拍，好刺激但係玩到頭暈，逸逸話今日唔想玩第二次。
休息一下先去睇企鵝，剛好遇上餵食時間。
到企鵝搶住食飼養員手中的魚好搞笑，見到飼養員出盡法寶去餵俾啲無咁主動的企鵝，好似我餵皮克敏咁。
可愛的南瓜和鬼鬼
逸逸見到節目時間表上面的海豚探秘話好想睇，原來係海洋劇場的新節目，以環保做主題，有海獅同海豚一齊表演。
雖然故事無聊而且演員的普通話對白說得很爛，但係其實我都係主要睇海豚同海獅者。
逸逸第一次玩飛天鞦韆
仲話超好玩，其實我地仲玩咗沖天搖擺船，不過唔知點解原來無影相，依兩款機動遊戲臨走都要encore。
跟住我地去咗尋鯊探秘睇鯊魚，過程都好有趣，玩互動遊戲認識咗唔同鯊魚的牙齒，又照X光睇鯊魚的消化系統由食嘢到疴屎的過程。
鯊魚傻笑~
我們去到熱帶雨林基地，好可惜熱帶激流維護中無得玩，我地去咗參觀熱帶雨林探險徑，又逛了新開的爬行探索基地，依度啲青蛙靚到好似瓷器咁，不過我係度俾蚊狂咬。
本來打算早點去吃晚餐，點知殺出一個程咬金，就係排隊參與了唯一一個Halloween活動 — Under the Castle 鏡中鏡。
依個係一啲都唔驚既影相打咭位，我地依張相其實係瞓係地下影的。
我地今次都係繼續去冰極餐廳食晚餐，不過今次逸逸無特別埋去玻璃旁邊睇企鵝，反而被家姐細佬出世的影片吸引住，好可愛。
今次我地點咗HALLOWEEN特式美食，我們點了「通靈拼盤」以及「暴瘋眼」香濃肉丸配鮮茄扁意粉。
飲品方面我們試了這杯「透視VDB」
倒入遇冷變色杯後，Voodoo Boo的X光片就會出現，隻杯仲可以帶返屋企添~
食完飯出到嚟天已經黑晒，成班妖魔鬼怪周圍走。
剛剛食飽唔好去玩機動遊戲住，我地去咗玩攤位遊戲，今年揼青蛙，空手而回。
7pm後包場無排咁耐隊繼續去玩機動遊戲。
前年玩咗四次的極地時速過山車，今年只係玩一次，因為要把握時間挑戰其他新遊戲。
首先玩咗超速旋風，逸逸排隊時好緊張，玩完的comment是可以涼爽睇風景。
之後我地去咗排隊玩橫衝直撞，排隊時有隻鬼走嚟同我地傾計。
逸逸未夠歲數可以做司機，爸爸同佢玩一架。
我自己揸一架車，專門周圍撞人，當然包括兩父女喇~
最搞笑係隻鬼落咗場同我哋一齊玩，我都有追住佢嚟撞。
Cosplay 厲鬼派對跳舞表演
逸逸話想ENCORE飛天鞦韆同埋沖天搖擺船，唯有再次經過香港靈異結界。入夜之後成條路都係鬼，但係要去玩飛天鞦韆同埋海盜船又係必經之路，唯有好好保護逸逸唔好俾鬼嚇親，佢夜晚發惡夢就弊傢伙！
個符寫住小心地滑超搞笑
晚上的飛天鞦韆
一邊玩沖天搖擺船一邊睇「體能瘋人狂舞間」
坐返纜車落山，逸逸話想坐紫色纜車竟然願望成真，我哋話早知叫佢俾number買六合彩，結果成程纜車變成常識堂介紹六合彩係乜嘢。
靚靚天星小輪+熊貓姊弟
海洋公園再見