有一日買了一本U MAGAZINE，入面教煮好似香港家庭個個都識煮的蕃茄炒蛋，不過我一向煮的蕃茄炒蛋只係加鹹加水炒，所以食落無乜汁，見到雜誌張圖好多汁好似好好送飯，於是就跟佢食譜試下，又真係好好味喎~

材料：

• 蕃茄             2個
• 雞蛋             3隻
• 片糖            半片
• 茄汁             2湯匙
• 喼汁             3湯匙
• 幼鹽             少許
• 生粉             適量
• 水                 適量

做法：

1. 蕃茄去蒂切角，片糖切碎。
2. 打蛋，逐隻蛋黃上落鹽，拂勻成蛋漿。
3. 大火燒熱鑊，落油及蛋漿，以中火慢慢火煎炒約30秒至九成熟，盛起備用。
4. 蕃茄落鑊以中火炒約30秒至半熟，落片糖碎，轉小火炒至番茄果囊開始融化，加入一湯勺水至水位大約蓋過番茄。
5. 落鹽、茄汁及喼汁兜勻，再炒2分鐘，逐少慢慢落生粉芡，兜勻至芡汁能掛鑊鏟上。
6. 雞蛋回鑊，略煮5秒便可上碟。

備註：原食譜用白醋我自己改用喼汁，這個替代法已試過不同的食譜，效果都唔錯；另原食譜落蕃茄前會先爆香薑蓉，另落茄汁後加蔥段，相信可增添香氣，不過屋企無這些材料，所以略過。

逸逸唔係太鍾意中式煮菜的食法，但食上海菜飯就會乖乖成碗連菜都食埋，所以決定試下自己係屋企整上海菜飯，結果大成功，好食到逸逸話要添飯呀﹗

材料：

• 白米              1.5杯
• 雞湯              按飯煲煮飯指引
• 小棠菜/白菜   4兩
• 金華火腿        1隻麻雀SIZE
• 薑                  2片
• 橄欖油           1茶匙

做法：

1. 將金華火腿及小棠菜切碎。
2. 白米洗淨後，放入電飯煲，加入雞湯，開始煮飯。
3. 用中火燒熱鑊，加少許油，加入薑片炒香，加入金華火腿炒香，加入小棠菜炒勻。
4. 飯熟時，加入金華火腿、小棠菜及橄欖油拌勻，即成。

自從BABYMOON係韓國食過一碗超級美味的鮑魚粥之後，係屋企跟唔同食譜都整過好多次鮑魚粥，不過以今次跟白鍾元依個食譜最正﹗

材料：

• 鮮鮑魚                     8隻
• 紅蘿蔔                     1條
• 麻油                         4湯匙
• 雞蛋                         每人1隻
• 鹽                             適量(按口味)

做法：

1. 米洗淨後浸泡在水裡半小時，瀝水備用。
2. 將湯匙插入鮑魚殼和肉之間取出鮑魚肉。
3. 用剪刀剪下內臟，這時注意不要弄破內臟。
4. 將鮑魚切成薄片，切片時發現堅硬的牙齒要取出。
5. 內臟用刀剁細。
6. 紅蘿蔔切丁。
7. 開火，在鍋裏加入4湯匙麻油。
8. 先炒米之後，加入切成薄片的鮑魚，讓米和鮑魚吸飽麻油。
9. 加入剁細的鮑魚內臟。
10. 用勺子均勻地攪拌米、鮑魚和內臟。
11. 鮑魚炒熟後倒入飯煲，按飯煲指導配合米量加水。
12. 按煲粥鍵開始煲粥。
13. 將雞蛋分成蛋黃和蛋白。
14. 在粥煲好前大約10分鐘加入紅蘿蔔和蛋白。
15. 粥煲好後加鹽調味。
16. 盛盆後再加上蛋黃即成。

參考食譜：跟著韓國食神白種元學做料理》鮑魚粥-風傳媒 (storm.mg)

早前買咗4隻皮蛋就快到期，最簡單的消耗方法當然就係整涼拌菜喇~酸酸辣辣當然最惹味，但屋企無中式酸味醬料鎮江醋，不過用喼汁都可以頂住先架~

材料：

• 皮蛋                     4隻

醬汁：

• 喼汁                     3湯匙
• 糖                         2茶匙
• 生油                     1湯匙
• 水水手作麻辣油   2湯匙
• 麻油                     1湯匙

做法：

1. 皮蛋放入滾水煮2分鐘，去殼，切成小塊，舖在碟子上。
2. 將醬汁材料拌勻，隔水加熱至糖溶化，待涼。
3. 將醬汁淋在皮蛋上。

TIPS：加埋芫茜、蒜頭會更爽口，不過好似我咁屋企乜都無就咁食都已經好唔錯。

參考食譜：【涼拌皮蛋】15分鐘完成譚仔小食　簡易涼拌尖椒皮蛋 | U Food 香港餐廳及飲食資訊優惠網站 (ulifestyle.com.hk)

自從買了一包急凍生蠔回家，就一直心思思想試下整砵酒焗蠔，沒有想過原來一般超級市場是買不到砵酒的，結果要透過HKTVmall訂購先搞掂。

另外，我亦沒有想過原來煮砵酒焗蠔好易煮，不過我遺忘了以前食過砵酒焗蠔的味道，結果個汁雖然好美味但太稀掛唔到汁，所以我調整了食譜的寫法，下次再跟住煮就應該VERY GOOD了。

材料：

• 急凍生蠔    5隻
• 紫洋蔥       1/4個
• 蒜茸          1茶匙
• 粟粉          適量
• 牛油          適量

醬汁：

• 砵酒          100毫升
• 蠔油          1茶匙
• 豉油          1湯匙
• 糖              1茶匙

做法：

1. 洋蔥切絲備用
2. 蠔洗淨，用滾水灼1分鐘，瀝水並用抹手紙印乾。(沒有解凍似乎也沒有大影響)
3. 蠔撲上粟粉
4. 燒熱平底鍋，落少許牛油
5. 煎蠔至每邊呈金黃色，用吸油紙吸油後，放在焗盤上
6. 用同一平底鍋再加少許油，炒香蒜蓉，然後加入洋蔥煮至半透明
7. 加入醬汁拌炒至汁收杰
8. 把醬汁淋上蠔面
9. 放入200度焗爐焗8分鐘即成

參考食譜：砵酒焗蠔 (daydaycook.com)