二零二四年六月二十八日(星期五)
不得不讚一讚我阿妹的魄力，她在4月的時候通知我們預訂了6月28日至30日曹公潭三日兩夜宿營4間10人房共40位，再在親友間廣發邀請，最後促成了這趟32人的宿營。
妹妹所有事情都做到足，我地好似參加旅行團咁，除了出發之前編房、訂餐、提供營地活動資料之外，連行李清單都提供埋，真係好勁。
今早逸逸仲要返學，而且是校外教學去咗動植物公園所以特別遲放學，食完午餐我地就直接坐UBER去營地。
我們大約3:20PM來到曹公潭戶外康樂中心，真係唔記得對上一次宿營係幾耐之前的事了。
L5接待層有一個LEGO模型，除了有型之外也非常實用，因為曹公潭的地方都好大，模型可以方便大家了解一下戶外營地設施的位置。
至於室內範圍就可以參考依個樓層指示牌，我們的房間就在L7樓層。
今次係逸逸第一次宿營，所有事情對她來說都是新鮮事，包括第一次自己舖床。
因為今次係大房，所以一家人都要分男子組女子組分房瞓，我地兩母女同媽媽、妹妹曉曉詩詩三母女、曉曉的姑姐LIZA同埋曉曉同學汶霞及她的姨婆一間房，逸逸對於唔能夠同她的爸爸一間房好遺憾，話要影我地張床俾爸爸睇。
大家都獲分發營友貼紙，因為日營人士同埋宿營人士使用設施的時間是不同的，所以要用貼紙作出分辨。
我地宿營人士主要是每日的9:00AM-11:00AM、3:30PM-5:30PM及7:00PM-10:00PM可以使用營地特定活動例如球類活動以及需要教練指導的活動，至於自由活動時間可以去游水以及使用兒童遊樂場設施等。
大家剛到埗都未有太多IDEA，本來諗住帶小朋友去室內兒童遊戲室玩下，點知去到先發現鎖咗門，等待職員開門期間先帶班小朋友去室外兒童遊樂場玩下。
大家都玩得好開心
之後就入室內兒童遊戲室嘆冷氣，雖然入面全部都係BB玩具，小朋友仍然盡興。
唔好浪費參加營地特定活動的時間，我地出去戶外場地EXPLORE一下。
逸逸終於可以玩她最期待的滾軸溜冰，因為她剛剛開始上緊滾軸溜冰暑期班嘛。
滾軸溜冰講解同著裝備的時間仲耐過玩，不過好彩逸逸玩得好開心。
由於她平日在室內場地學滾軸溜冰，來到這種比較粗獷又無乜保養的場地時起初是有點戰戰兢兢。
慢慢開始適應
唔駛扶住都可以有信心自由活動了
其實見到要著咁多裝備咁麻煩都唔係太想玩，同埋同真雪溜冰相比，我對於滾軸溜冰的恐懼比較大，感覺好似會去得好快好難控制。不過逸逸好想我陪佢一齊體驗佢喜歡的活動，去就去喇~但係事實上因為我先招呼完逸逸等佢開始玩我先開始著鞋戴護具，結果玩咗一個圈就夠鐘了。
我地玩滾軸溜冰的時候，恆仔同咗爸爸媽媽去射箭。
之前玩射箭攤位遊戲很優秀的恆仔，終於可以體驗一下真射箭了。
玩完返嚟又未夠鐘食晚餐，大家係電視室涼下冷氣傾下計。
成班小朋友係幅3D畫上面玩得不亦樂乎。
在這兒上演了大量的戲碼
今天的晚餐係圍菜，幾拾年如一日的宿營飯菜，菜多肉少的清淡口味，仲要白飯無得任裝，我地有老有少食物都只係勉強夠分，發育時期的年輕人一定唔夠飽，真係唔明點解唔可以改進一下。
我們是第一晚就入營的先頭部隊，其他團友明天才陸續入營。
近日天氣都唔係好穩定，食完晚餐趁好天去游咗水先，今晚游夜水我地同爸爸媽媽及健仔一家包場呀。
有得游水小朋友最HAPPY
瞓覺之前仲同埋DAY和健仔打咗一陣乒乓球，今次我地特登帶咗私家球拍嚟架~