二零二四年七月六日(星期六)
自從跟咗幾次屯門牛上九徑山之後，愛上了登山，明明無長課經驗都膽粗粗咁參加咗屯門牛山系組的七堡連登活動，全程約行37.1K，預計9小時完成。
七堡其實係講緊共有七座的麥景陶碉堡，於1949年至1953年間興建的香港警崗，分別位於香港邊境禁區內多座山嶺上，於英屬香港時期用以監視中國解放軍及深圳河邊界對岸的形勢，而七座碉堡由東至西包括伯公坳(沙頭角)、礦山(蓮麻坑)、白虎山(香園圍)、瓦窰(打鼓嶺)、南坑(文錦渡)、馬草壟(落馬洲)及白鶴洲(米埔)。
我們租了旅遊巴浩浩蕩蕩的出發，好像小學生去旅行一樣興奮。
我們8:15AM到達出發地 — 沙頭角的担水坑村，起步前大家首先去個廁所，這個廁所啲蚊多到嚇死人。
前往紅花嶺
靚靚的招牌
我其實根本係越級挑戰，依啲路根本唔係平日行開的山路，仲豎立寫住「此段路艱險難行」的告示牌，有如平日只係跑開5K的走去跟人跑半馬拉松一樣。
今次行山的事前準備功夫做到十足，大家提議的2L水(2X500ml水+2X500ml冰寶礦力)、帽、防曬手袖、長褲(我穿了水上活動用的防UV長褲)、傘、太陽油、蚊怕水全部都預備妥當，也帶了後備替換衣服，越野背心背囊也是特別為今次活動而添置的。
大約9:15AM來到第一個打咭點：伯公坳碉堡。
景觀開揚的紅花嶺觀景台
山友請食冰凍青瓜，爽呀﹗又學識一樣夏天上山的智慧。另外，當我自以為自己好聰明的帶備結了冰的寶礦力上山，點知有經驗人士更加聰明，他們還會將結了冰的飲品放進保溫袋，當我的飲品早已變成常溫，他們的飲品還在慢慢溶雪中……
半晴半雨，不過今日烏雲好似驚咗我地，越追越走。
成班人一齊行山真係好熱鬧
特地要額外爬升一小段的紅花嶺標高柱
麥景陶(礦山)碉堡
我們來到蓮麻坑禁區邊緣
沿著禁區鐵絲網行走
山路都唔易行
之前都提到今日帶了1L水+1L寶礦力，其中500ML寶礦力是救命備用飲品。終於來到第一個補給站，買了一罐冰凍可樂一罐冰凍雀巢咖啡同埋兩支冰凍的750ML水，仲借用埋洗手間，難得如此偏僻的小士多沒有抬高飲品的價錢，還對沒有足夠的冰凍飲品提供給我們而感到抱歉，我地都非常唔好意思。
白虎山碉堡
今日前半段沙頭角至香園圍的伯公坳、礦山同埋白虎山警崗雖然大上大落，不過都仲應付到。
第二個補給站位於香園圍口岸旁邊，在一家完全以為自己去了大陸的士多買了支陳皮特飲試下，又鹹又甜又酸，都幾好飲。
烈日之下見到涼亭都休息下
接著就開始好多沿著馬路前進去其他碉堡
第四個瓦窰警崗位於一個小山丘上面，雖然都幾斜，不過因為是石屎路而且唔高，所以都無乜問題。
沿著文錦渡路前進，途中有少少餓打算食個飯糰，不過因為成隊人腳步太快，根本沒有停下來的時間，於是一邊行一邊拎出嚟再一邊食，其實都好狼狽。
這是第五站南坑的入口，這兒有一部只剩下雀巢咖啡的汽水機，上山前先飲一罐補下糖又補下咖啡因。
我們沿著福建填場登山，個山唔高但超級斜，而且基本上係無路，仲有路面超多碎石所以好難行。
上到山發現仲要行類似的路再翻個山頭先到南坑警崗，打完咭再沿路折返，加上今日小暑熱到爆炸，雖然已經有勇猛的先頭部隊繼續向前，但係我已經想放棄了……
水邊綠色的建築物就是南坑警崗，遠距離打咭算了。
落山的路實在太難行，我起碼滑腳了三次，根本無閒暇影相作紀錄。回到福建墳場的涼亭休息下等埋大隊回來，我再買了一罐雀巢咖啡回一回氣，也用凍水洗下面和手，有山友直頭將凍水照頭淋。
下一站係去食羅太豆腐花，我雙腳已經無乜力，神奇的是原來當一個人雙腳無力又要堅持向前的時候，慢JOG比起行路舒服一點，於是我決定慢慢跑過去。
HELLO羊咩咩
熱門打卡景點：雙魚河大水管
羅太豆腐花的冰凍豆漿和冰凍豆腐花，正﹗
要繼續去埋餘下的兩個碉堡仲要行多十幾公里，擔心自己頂唔順之餘所需時間亦比預計之中長，最後決定食完豆腐花就早退，同幾個一齊早退的山友搭UBER返屯門。
今次4.5/7堡連登，移動時間為6小時14分，經過時間為8小時10分，26人參加16人完成。
繼上次首半馬跑到臨尾聲無電之後，今日隻I-WATCH再次出賣我，行到大半又無電，好彩同時開咗STRAVA作紀錄，第二日就的起心肝即刻去買隻GARMIN錶以應付長時間運動了。