二零二四年七月十四日(星期日)
2023年跑完為食跑10K之後開始想試下玩山賽，妹妹的第一次邀約係2023年11月中，當時係報名參加12月中的越嶺大埔50的21K賽，不知天高地厚的我都有興趣參加可惜比賽當日要返工，最後妹妹同妹夫參加咗，結果行錯路在關門時間前趕唔到去CP 1最終DNF。第二次邀約在2024年1月中，當時係報名參加4月中的SPACE TUNNEL RUN，已經講好一齊參加，點知到1月尾就發現比賽改咗去4月初，因為預咗復活節假去旅行又作罷。到5月初我反邀約妹妹參加7月21日的夏日黃昏賽@城門站，又輪到她於比賽日去旅行，最後依個比賽我自己參加咗；至5月21日妹妹分享了7月14日舉行的飛越荷蘭徑，終於拍板一齊參加，迎來我的第一次山賽。
比賽在香港仔郊野公園傷健樂園燒烤場起步，我們約好7:45AM在中環交易廣場地下巴士站等，一起搭70號巴士到香港仔再行上起步點，上去條斜都幾甘，當熱身都唔錯。
比賽路線是由香港仔郊野公園傷健樂園燒烤場至中環花園道3號，短短地11KM400多米攀升，試下水溫。
與屯門牛山友合照
出發喇~我地無試過路，所以前路完全係UNKNOWN。
因為大家速度不同，之前參加路跑都係一齊喺起點出發之後各有各跑再在終點會合，不過妹妹對於上次山賽行錯路DNF仍心有餘悸，要我一定要等埋佢。所以今次由佢帶頭我跟尾，按她的速度去玩今次比賽。
七月玩山雖然好似好熱，但因為沿路有樹蔭，其實比路跑舒服得多，而且遇上溪水可以濕下條毛巾抹下臉，即刻成個人醒晒﹗不過最驚係遇上蜜蜂，我地出發前已經聽到有人話路上有蜜蜂叫大家小心，去到附近又聽到有其他參賽者提點我們，好有愛。
水站位於馬己仙峽道配水庫公園，補給超級正﹗
飲咗好多可樂，又食咗冰菠蘿同埋冰西瓜，我已經充滿力量喇~
終於來到太平山，依邊的路比較熟悉。依段路其實係攀升最辛苦的一段，而且最麻煩的是路面佈滿青苔，真係好滑。
不過可以睇到好靚的風景。
差不多到終點了
原來山賽唔駛跑頭3名都有得衝線架~
最後完成時間是2小時5分，總名次198/265，性別名次61/93，組別名次34/47。
終點又係好多嘢食，最正係冰凍涼粉﹗
第一次山賽大成功﹗
攝影師邀請我地影靚相
完賽獎牌係荷蘭水蓋，好別緻~
山賽真係比路跑多好多攝影師，而且可能因為無PACING的壓力，同路跑相比，山賽的笑容真係燦爛好多﹗