踩完單車我地就返房換衫去浸溫泉了。
因為今次入住童趣房，所以房內已備有小童浴衣和小童拖鞋，比上次來更方便。
因為酒店有維修工程，酒店客人專用入口臨時封閉，我們要由正門入去露天溫泉區。
點知都未行到入去就俾對面的職員叫住咗，原來有免費爆谷和飲品呀~
今次我地唔記得帶防水袋，所以係溫泉入面影咗幾張相就放好相機盡情享受了。
無來御溫泉一年，依度又好多嘢唔同咗，入口附近多咗個泳池同埋波波池，按摩的地方搬咗位，什麼瓜果泉、椰奶泉、蜜糖泉個堆封咗做維修，唔知又會有乜嘢新攪作。逸逸最瘋狂當然係佢上次的最愛瀑布泉喇，另外今次係泳池都玩咗好耐，坐鱷魚水泡、玩沙灘波同埋普通大水泡無限LOOP；可能因為我身重，我要坐係鱷魚水泡上面真係好難平衡，逸逸仲話要玩打鱷魚遊戲，要坐得穩仲要逃走真係難上加難。我就覺得最正係地熱，好想瞓一個晏覺。
飲品方面都是汽水、涼茶個啲，不過今次有個竹蔗茅根好清甜，另外新增了一個甜品COUNTER，我吃了一個檸檬愛玉+山楂、花生、桃膠和花奶，好味道。
我們出發前一晚恆仔係屋企俾一隻黑色的怪蟲咬咗一啖，成隻手又腫又痛，即刻去咗港安醫院睇急症，依家仲食緊抗生素同止痛藥，所以今次佢都唔敢浸溫泉，只係坐係池邊浸下腳陪下我地。
今次透過KLOOK訂PACKAGE送流浪咖啡的下午茶一份同埋夜晚酒吧街飲品一杯，我地睇住時間差不多就返房沖涼然後去食TEA。
可以係餐牌任揀一杯飲品，以及在餅櫃任揀一件蛋糕或麵包。
我地揀咗個洞穴位CHILL下
逸逸揀咗一件豬仔樹莓蛋糕以及一杯莓莓鮮牛乳，我另外加錢買多一杯黃杏冰搖美式。
其實其他位影相都好正
食完TEA就等恆仔返房休息一下，我帶逸逸入返溫泉區去玩波波池。
今次依個波波池位於溫泉入口的左邊，同職員傾開計先知原來依個新遊戲室係去年五月先開放，難怪上次來的時候還未有見到。同原本的波波池相比，這個波波池滑梯無咁高，但多咗跳彈床同埋玩投擲遊戲，我可以陪逸逸一齊投球。
玩到差不多6PM我地就返房同恆仔匯合，預備落去小湯鎮食大餐了，下面已經預備得如火如荼了。