二零二五年六月二十二日(星期日)
去年已經留意到依個「跑碼頭」活動，繞住維港跑一圈實在太有趣，不過當時的我當然未有能力，今年終於可以同妹妹結伴同行。
7:50am開跑，如果搭巴士4:30am就要起身，最後決定駕車，可以遲一個鐘頭起身之餘接埋阿妹仲可以比預計時間提早到達九龍城碼頭，慢慢嘆埋早餐先過嚟比賽。
屯門牛合照
今天的路線係九龍城碼頭→觀塘碼頭→北角碼頭→灣仔碼頭→中環碼頭→尖沙咀碼頭→紅磡碼頭→九龍城碼頭，每一個碼頭會獲發一條印有該碼頭名字的手帶，出發前先領到九龍城碼頭的手帶。
預備出發囉
這兒是啟德空中花園，剛建成的時候跟本地遊旅行團來過一次，當時除了這個空中花園之外，放眼四周都是地盤。
第一個CP觀塘碼頭，我哋要係依度搭乘大會安排的汽車渡輪去北角碼頭。我哋雖然唔係跑得快，但其實也唔算好慢，去到碼頭Fill好水影完相就剛剛夠鐘上船，上晒船就開船，恐怕真係會有第一組的人要等第二組班船。
小食有蟹柳棒、鵪鶉蛋之類，仲有依隻好可愛的鴨仔棉花糖，拎完之後突然驚覺一定要即刻食，唔係會變鴨餅。
睇之前的比賽相參賽者係坐舢舨，今年有贊助變成坐汽車渡輪。
雖然之前去土耳其和紐西蘭都有坐汽車渡輪，但係依架先至真真正正小時候坐爸爸架車時所搭的汽車渡輪。
舊式汽車渡輪依家活化成為洋紫荊維港遊的船，中層用來吃自助餐，選手包都送咗買一送一Coupon，雖然睇落感覺食物都好一般，不過我同阿妹都話可以一家大細一齊嚟下。
大家都上頂層甲板睇風景
依種跑下停下的玩法好正，可以忘記配速，盡情享受跑步的樂趣。
落船又到第二個CP北角碼頭
係度我又遇上另一個屯門牛
阿妹跑唔慣烈陽唔係好頂得順，飲啲嘢降下溫，市區跑步最大的好處就係周圍都有補給。
CP3灣仔碼頭
CP4 中環碼頭 – 由灣仔到中環依一帶好多人跑步，我哋又係洗手間停得有點耐，附近已經唔太見到其他參加者。
由中環去尖沙咀就自費搭天星小輪
妹妹一來到碼頭就話要搭上層，我們到時剛剛走了一班船，等船期間一直都沒有見到其他參加者，我們也在想係咪我哋已經第一組包尾？
一落船又到CP5尖沙咀碼頭，見返一堆參賽者，原來只係大家去到中環碼頭就直接跑入去搭船，無我哋咁講究跑咗咁遠都仲要特登行樓梯去搭上層。
不過我哋點都尾尾哋架啦，因為CP義工問我哋知唔知後面仲有多唔多人。
星光大道周圍都係人，我地基本上係一邊跑一邊穿過一堆又一堆的遊客，仲有，我地見到有周杰倫呀！
見唔見到嗰舊飄緊過嚟的大雨雲同埋下面的傾盆大雨？我地可唔可以跑得快過舊雨雲？
殺到埋嚟喇~
成身濕晒
來去匆匆的雨雲，好奇妙的大自然。
來到CP6 紅磡碼頭，依個時候嘅我已經完成大雨的洗禮，個天黑完又光返了。
好彩阿妹download咗比賽路線GPX，入咗黃埔有一段唔係沿海邊跑的，不過比賽的特色係要去到CP，所以唔跟足佢路線自己搵Google Map導航都無問題嘅。
圍繞住維港跑一圈真係好有型！為咗配合HK100 SPOT活動，除了開錶之外，我仲特登分返九龍和港島段開Run2Go App記錄，方便計返兩個地區的跑步記錄。
完賽禮物係完賽獎牌+完賽Lego 海盜Figure
好有紀念價值的手帶
係終點飲咗汽水同埋凍美式咖啡，食咗件蛋糕同埋好耐無食過的唧唧冰。
今日依個跑碼頭好好玩呀~
比賽靚相：
